k i t e k a t i

Samstag, 9. Mai 2015

jä eusi zwoi Chätzli

dörf ich vorstelle?

das sind eusi zwoi Chätzli, wo mer scho bald zue eus hei dörfe ne...

Sie chöme us Wallbach und händ ihri Wurzle in Zeinige!

Sind die nid unglaublech härzig?

Gebore sinds am 3. April, do het jo mis Schätzeli Geburtstag.

Ich dänk, do gits negscht Johr e Kitekat-Chueche!:-)

Gebore sinds im Kleiderschrank und mir händ se scho dörfe go ussueche, wo sie erscht 3 Täg alt gsi sind...

und esooooooo gsehnds momentan us...

Händ mir doch euse Mizan so schwer vermisst und wie s mit ihm z End gange isch, verfolgt mi hüt no mängisch...
Ich bi froh, gliche die zwoi weder em Mizan no dr Maxi, sie sind so ganz anderscht und ich freu mi soo uf die zwoi Racker!!! Und do stand ich aso nid elei do:-)

das isch ihri Oma, d Shiva, wenn die au mol so gross wärde mach ich mir Sorge um s Chatzetörli:-)
S Mami, d Milly :-) - het au vo dem schöne Fäll chli g erbt und eusi Chline au es bitz, ich bi jo gspannt...

Vo Chatze zue de Vögel.... fauch fauch fauch....

mini neuschte Erfahrige mit Beton und Silikon!
Dem Vogel isch de Schwanz abbroche und er isch au sehr bröcklig gsi, obwohl ich würkli gaaanz lang gwartet hat mit usene... Ich glaub bald, de Sack Beton isch e Sch...!!!
Isch mer scho bi de letschte Guglhöpfli ufgfalle, dass de Beton fascht usenandgheit, aber irgendwie gits no sone Antik-Effekt, woni no cool gfunde ha....

Nur momentan wärs besser, ich hätt chli e besseri Qualität!

so viel Müeh mit dem Silikon und denn das!!!!!!!

d Flüge fehle komplett, aber s Gsicht isch wenigschtens super usecho und eigentlech isch er in sich jetz es Unikat für sich und ich ha glich Freud dra. Er gseht us, als wär er scho uralt... irgendwie no cool...

Ich wird die Silikonform nomol zämeflicke (ha se müesse ufschniede) und nomol e Alauf ne irgendwenn.

So wie au i eusem Garte... ich ha nomol vo vorne agfange, diesmol mit ganz viel Schnäggechörner...

vor eim vo den Chreis stand ich immer chli rotlos do, er isch in dr Mitti bepflanzt mit Rase. (isch aso nid uf dr Foti)

D Vorgänger händ Häsli gha und händ denn dört amigs ihres Gheg drufdo.

Und ich weiss jetz gar nid, öb ich würkli das ganze Gras muess ushebe und öppis neus drufpflanze...

viellecht het öpper e Idee...

Donnerstag, 30. April 2015

heicho vo de Ferie...

und dehei blüeht de Chriesibaum im eigene Garte!!!

und denn aber au die... aber das chunt alles scho in mine Favorite-Blogs vor:-)) ich merk ich bi hindedri...

euse Garte - er isch megaschön. Und es chunnt immer wieder öppis neus use, wo me cha bewundere und abgseh vom Löwezahn - d Romina het mer zwar glehrt, das sig dr dütschi Name, me müess do obe aso mundart schwätze, sprich Sunnewirbel - freuts mi immer.

Das do sind 4 Chreis zum bepflanze vomene Buregarte... es isch aber e Chrampf, chani nume säge...
Scho lang nütme dört drinne apflanzt, krieg ich die Erde - und sie isch so richtig lehmig - eifach nid locker ane... Ich glaub ich bruchti e Traktor:-) s git anderi, die händ e Kran im Garte;-)

Und nomol öppis... d Schnägge uf em Bözbärg sind schnäll... 12 Salat apflanzt, hüt lueg ich, es isch kei einzige me do!!! S Nochbersmeitli würd säge, alli Brownies sind gfrässe... sie het ebe bim bepflanze gmeint, die Salatwürfel gseche us wie Brownies:-)

Romina het sech e Hängematte poschtet und de Thomas isch denn mit ihre in Bau und Hobby gos Zuebehör chaufe und het se au no grad montiert, so cool!!

jo und jetz wirds aber langsam aktuell, ich chumm in d Gegewart...

ich probier mi am Silikonabdruck mache... ich bi au gärn im Bau und Hobby:-) ha normale Baumärtsilikon gno... ha denn erscht bim mache gmerkt, dass es do verschiedeni Farbe git:-)

und hüt isch s losgange mit de erschte zwoi Forme...

ich bi wie immer sehr gspannt und muess mi - au wie immer - gedulde...und warte wie de Engel...

denn die Form hani hüt wieder mit Silikon versuecht z schliesse... mol luege, öb das morn denn funktioniert...

El Sol

De Früelig bin ich scho zum 3. Mol mit noch Mallorca!

Es isch megatoll gsi. Scho chli routinierter diesmol und ich ha mer au chli mehr zuetraut.

Denn ich ha s Schalte jezt würkli intus und au d Klickpedale.

Drum hani mi au getraut, mich in dr Hobbygruppe azmälde.

Ich gibs zue, ich bi mängisch, nei eigentlich jede Tag, e chli an mini Gränze cho...

Aber ich has dureghalte die ganz Wuche, jede Tag hani dänkt, ich glaub ich gang e Gruppe tiefer... Bi dr Zielankunft vor em Hotel het dr Gruppeleiter immer d Tour vom negschte Tag vorgstellt und het no "es paar" Kilometer und Höhemeter mehr drufgschlage, dass ich mir würkli jedesmol dänkt ha, ich strich mi glaub vo dr Lischte.

Denn bisch eine zäme go trinke und bisch motiviert und überredet worde...

Noch em Dusche bisch entweder wieder so früsch gsi, dass es Der zuetraut hesch oder so müed, dass nüm hesch möge zum Hürzeler-Aschlagbrätt fürelaufe...

Jedefalls han ich mi eifach nie gstriche:-)

Soviel sind in eusere Gruppe gsi am Zischtig ich lueg glaub in Schilf use, aber ich ha a dem Tag s Kloschter Luc vor mir gha und ha chli dr Bammel gha ob ich mitmag. Drum, ich bi uf dere Foti gedanklech glaub gar nid do gsi!

Toure-Guide: Martin, vor mir d Sabine, e richtigi Ulknudle, ächt luschtig gsi mir ihre.

Gruppebild vo dr Speed-Gruppe mit mim Schätzli.

Ich bi immer soo stolz, wenn ich mit ihm cha age:-)

Ich wird aber au immer vo allne gfrogt, wie schnäll sinds geschter gfahre, wieviel Höhemeter händs gmacht und sie gheie denn amigs fascht hinde-n-use... oder am em Velo:-)

Do hani no möge lache...

Do au wieder. Aber das zwüschedrin... ich bi s erscht Mol ab em Velo abgstiege und bi 50 m gloffe bis ich mini Bei und mi Po wieder gspürt ha, ich bi aber wieder ufgstiege und bis aso fahrend obe acho!

Pi-pi-Pause:-)

Die Gschwindigkeit händ mer glaub am Donnschtig druf gha!

ich ha in dere Wuche 560 km gmacht!!

D Jeans händ scho Mitti Wuche plötzlech nüm richtig gsässe, d Bei händ ihri Muskle zeigt.

Und dehei acho hani gmerkt dass i scho wieder es Kilo zuegno ha:-(

Ob das jetz alles in de Bei steckt...? Hmmm..... Sone Sch...

Viellecht au wegem feine Ässe dört ...

Bispillswies am Mittwoch händ mer Ruhetag gha und sind nur 30 km gfahre zum el-sol-Restaurant...

zu dem Lied händ mir chillt...

und mir händ zuegschlage. Ändlech wieder mol zmittagässe anstatt immer nur zmorge und znacht! Megafein isch s gsi und mit dere chillige Musik dört, eme Glas Wisswi und d Sunne wo eim uf de Velodress schint und das phantastische Meer vor de Auge..... paradiesisch eifach...

Danke Schätzeli!!!!!!!!!!!!!!!!!!

Freitag, 20. März 2015

3 Mönet im Schnälldurchlauf....

aso ich mag jetz nid de Wiehnachtsbaum zeige, obwohl - sone grosse und schöne händ mer glaub no gar nie gha!!! Aber irgendwie passt s jetz halt voll nid...

Aber do wenigschtens no es Adväntsgschänkli will i jo eigentlech vorgha ha die z zeige.

Denn het Romina vor dr Wiehnacht no dörfe e Schuelbsuech bi ihrer neue Klass uf em Bözbärg mache... E Klass mit gaaaanz viel Meitli und es gfallt ihre mega!

denn do.... ziemlech gschafft, ämel ich....in dr letschte Zügel-Putzphase wo mer scho uf em Bözbärg gwohnt händ, d Romina aber no z Brugg in d Schuel isch und eigentlech zwoi leeri Küchene gha händ... do händ mer eus im Schönegg-Restaurant troffe zum chinesisch go ässe.

s het umbedingt mit Stäbli müesse si! Linda mit Vegetarier-Täller... alles leergässe!

und denn grad noch em Abge vo dr Wohnig z Brugg......uff..... Skiferie! Ich bi so kaputt gsi vo dere Zügelei dass me mich fascht het müesse zum Glück zwinge!!